طوفان ڈالفن کا چین کا رخ، شدید بارشیں اور بڑے پیمانے پر انخلا

اشو طوفان 'ڈالفن' نے مشرقی چین کے ساحلی علاقوں کو اپنی لپیٹ میں لے لیا ہے، جہاں تیز ہواؤں اور ریکارڈ توڑ بارشوں کے باعث معمولاتِ زندگی معطل ہو کر رہ گئے ہیں۔ طوفان کے ممکنہ خطرات کے پیشِ نظر چینی حکام نے انتہائی الرٹ جاری کرتے ہوئے دس لاکھ سے زائد افراد کو فوری طور پر محفوظ مقامات پر منتقل کر دیا ہے۔ متاثرہ علاقوں میں انتظامیہ کی جانب سے ہنگامی اقدامات کیے جا رہے ہیں تاکہ جانی نقصان کو کم سے کم رکھا جا سکے۔ طوفان کے شدید اثرات اقتصادی حب سمجھے جانے والے شہر شنگھائی اور اس کے گردونواح میں نمایاں طور پر دیکھے جا رہے ہیں۔ شدید بارشوں اور طوفانی ہواؤں کی وجہ سے شنگھائی کے ہوائی اڈوں پر فضائی آپریشن شدید متاثر ہوا ہے اور تقریباً 950 پروازیں منسوخ کی جا چکی ہیں جس سے ہزاروں مسافر پھنس گئے ہیں۔ اس کے علاوہ مواصلاتی نظام اور بجلی کی ترسیل کے ترسیلی نظام کو بھی نقصان پہنچا ہے، جس سے متعدد علاقوں میں اندھیرا چھایا ہوا ہے۔ محکمہ موسمیات کے مطابق طوفان کا دائرہ کار مزید وسیع ہو سکتا ہے جس کے باعث مزید بارشوں اور سمندری لہریں بلند ہونے کا خدشہ ظاہر کیا گیا ہے۔ اس سے قبل اس طوفان نے جاپان کے جزیرے اوکیناوا کو بھی نشانہ بنایا تھا جہاں پچاس ہزار سے زائد عمارتیں بجلی سے محروم ہو گئی تھیں۔ چین میں مقامی انتظامیہ اور امدادی ادارے الرٹ ہیں اور شہریوں کو بلاضرورت گھروں سے باہر نہ نکلنے کی ہدایت کی گئی ہے۔