پاکستان کا عالمی واچ ڈاگ کو پولیو کے خاتمے اور سکیورٹی چیلنجز پر اہم بیان

اسلام آباد: پاکستان نے عالمی آزاد مانیٹرنگ بورڈ (آئی ایم بی) کو آگاہ کیا ہے کہ ملک طویل عرصے سے جاری پولیو کے خلاف جنگ کے ایک فیصلہ کن مرحلے میں داخل ہو چکا ہے، جہاں وائرس کو محدود خطوں تک محدود کر دیا گیا ہے۔ جنیوا میں ہونے والے آئی ایم بی کے اعلیٰ سطح کے جائزہ اجلاس کے دوران، پاکستانی حکام نے دعویٰ کیا کہ ملک کی حکمت عملی مثبت نتائج دے رہی ہے، لیکن باقی ماندہ ہاٹ سپاٹس سے ٹرانسمیشن کو ختم کرنے میں ناکامی سالوں کی محنت کو خطرے میں ڈال سکتی ہے۔ وفاقی وزیر صحت ڈاکٹر ملک مختار احمد بھرت کی قیادت میں پاکستانی وفد نے بورڈ کو بتایا کہ 1990 کی دہائی کے اوائل کے مقابلے میں ملک نے پولیو کے کیسز میں 99.8 فیصد تک کمی کی ہے۔ اجلاس میں وزیراعظم کی فوکل پرسن برائے پولیو ایرادیکیشن عائشہ رضا فاروق اور دیگر اعلیٰ صوبائی حکام بھی موجود تھے۔ حکام کا کہنا تھا کہ حالیہ برسوں میں سیاسی عزم، بہتر احتساب اور ڈیٹا پر مبنی فیصلوں کی بدولت وائرس کے پھیلاؤ میں واضح کمی ریکارڈ کی گئی ہے، جو کہ ایک حوصلہ افزا امر ہے۔ عائشہ رضا فاروق نے واضح کیا کہ وائرس اب پورے ملک میں نہیں بلکہ انتہائی مشکل اور سکیورٹی کے لحاظ سے حساس علاقوں خصوصاً جنوبی خیبر پختونخوا میں سمٹ کر رہ گیا ہے، جہاں سکیورٹی خدشات کی وجہ سے پولیو ٹیمیں اب بھی بعض مقامات پر بچوں تک نہیں پہنچ پاتیں۔ انہوں نے بتایا کہ حکومت نے اس مسئلے سے نمٹنے کے لیے ایک نئی اور ہدفی حکمت عملی اپنائی ہے، جس کے تحت چھوٹے مقامی گروپس، بار بار دورے کرنے کی پالیسی اور معمول کی حفاظتی ٹیکہ جات کی مہمات کو آپس میں جوڑا جا رہا ہے۔ انہوں نے مزید کہا کہ اگر موجودہ رفتار برقرار رکھی گئی تو پاکستان کے پاس پولیو وائرس کی زنجیر کو توڑنے کا حقیقی موقع موجود ہے۔ یاد رہے کہ آئی ایم بی بین الاقوامی ڈونرز کی جانب سے کام کرتا ہے اور ہر چھ ماہ بعد دنیا بھر میں پولیو کے خلاف کارکردگی کی رپورٹ جاری کرتا ہے۔ پاکستان نے عالمی برادری کو یقین دلایا ہے کہ وہ اپنے بچوں کو اس موذی مرض سے بچانے کے لیے تمام دستیاب وسائل بروئے کار لا رہا ہے اور پولیو کا قطعی خاتمہ اب چند قدم کے فاصلے پر ہے۔